राष्ट्रिय झण्डा ओढाएर सन्नी खुनाको अन्त्येष्टि

0

कञ्चनपुर : बालिका निर्मला पन्तका हत्यारालाई कारबाही मागसहित प्रदर्शनका क्रममा प्रहरीको गोलीबाट मारिएका किशोर सन्नी खुनालााई अन्तिम विदाइ गरिएको छ ।

कञ्चनपुरको भीमदत्त नगरपालिका–९ ब्रह्मदेवस्थित महाकाली किनारमा राष्ट्रिय झण्डा ओढाएर सन्नी खुनाको अन्त्येष्ठि गरिएको हो ।

सन्नी खुनाको अन्त्येष्ठि अघि सात नम्बर प्रदेश सभामा नेपाल कम्युनिस्ट पार्टीका सचेतक सांसद तारा लामा तामाङले राष्ट्रिय झण्डा ओढाएर विदाइ गरेका हुन् ।

त्यस क्रममा प्रहरीको एक टुकडीले सन्नी खुनालाई शोक सलामी पनि दिएको थियो । सन्नीको अन्त्येष्ठिमा भीमदत्त नगरपालिकाका मेयर सुरेन्द्र विष्ट र बेदकोट नगरपालिकाका मेयर अशोक चन्द पनि सहभागी थिए ।

संघीय मन्त्रिपरिषद्को शनिबार राति बसेको आकष्मिक बैठकले सन्नीलाई शहिद घोषणा गरेको थियो । त्यही अनुसार सन्नीलाई प्रहरीले शोक सलामी दिएको हो । त्यसैगरी अन्त्येष्टिका क्रममा मानवअधिकारकर्मी, महिला र सयौँको संख्यामा स्थानीय सर्वसाधरण पनि उपस्थित भएका थिए ।

शनिबारको मन्त्रिपरिषद्को बैठकले सन्नीका परिवार र बलात्कारपछि हत्या गरिएकी निर्मला पन्तका परिवारलाई जनही १०–१० लाख रुपैयाँ दिने घोषणा गरेको थियो ।

त्यसक्रममा अर्का किशोर चेतन भट्ट पनि गोली लागेर गम्भीर घाइते भएका थिए । भदौ ५ देखि सुरु भएको प्रदर्शनले हिंस्रक रुप लिँदा सन्नीको गत शुक्रबार महेन्द्रनगरमा प्रदर्शनका क्रममा गोली लागेर ज्यान गएको थियो ।

बालिका निर्मला पन्तको गत साउन १० गते साथीको घरमा गएको अवस्थामा बलात्कारपछि हत्या भएको थियो । प्रहरीले त्यस घटनामा मानसिक सन्तुलन गुमाएका दिलीपसिंह विष्टलाई पक्राउ गरेपछि महेन्द्रनगरबासी आन्दोलित भएका थिए ।

Leave A Reply

Your email address will not be published.